Arestado ang isa ka High Value Individual (HVI) sa ginpatigayon nga drug buy-bust operation sa Barangay. Calajunan, Mandurriao, Iloilo City.
Ang subject amo si alyas Tonyo, 38, garbage collector kag residente sang nasambit nga Barangay.
Sa interview sang Bombo Radyo kay Police Captain Joebert Amado, officer-in-charge sang Iloilo City Police Station 5, iya ginpahayag nga naga-operate ang subject sa kagab-ihon kag nagakuha ini sang supply sa Jaro, Mandurriao, kag Arevalo.
Suno kay Amado, madamo sang mga pamuluyo sang nasambit nga Barangay ang nagareklamo batok sa subject, bangud sa paghupot sini sang mga armas kag iya ini ginagamit nga pagpamahog.
Dugang pa sang natungdan, nagdangat man masobra isa ka bulan ang ila monitoring sa subject bag-o ini nga natigayon nadakpan.
Narecover sa iya posisyon ang 20 grams sang suspected shabu nga may standard drug price nga P136,000, kag nakuha man ang 38 caliber kag isa ka shotgun.
Sa subong, yara na sa kustodiya sang mga otoridad ang subject kag magapangatubang sang kaso nga paglapas sa Republic Act. 9165 ukon Comprehensive Dangerous Drugs Act of 2002.
