Nagaplano na nga tun-an sang Iloilo City Government kag iban pa nga stakeholders ang magamay nga isla sa Iloilo River nga Makita sa Sunset Bloulevard.
Ini ang ginatawag sang mga residente kag environmentalists nga Isla Verde.
Sa interview sang Bombo Radyo kay Engr. Neil Ravena, Head sang Iloilo City General Services Office, iya ginpahayag dako na ang kontribusyon sang isla sa ecosystem sa lugar bangud sang mangroves kag mga kasapatan nga nagapuyo sa isla.
Suno kay Ravena, ginapasalig niya ini nga ireserba ang nasambit nga isla kasunod sang pagahimuon nga dredging sang Department of Public Works and Higways (DPWH) sa suba.
Dugang pa sang natungdan, dako ang nabulig sang Isla Verde bangud napahinay niya ini ang pagtaas sang tubig sa mga kaiping nga Barangay sang Sooc, Arevalo sa tion nga magta-ob ang dagat.
Sa pihak nga bahin, maga-conduct sang pagtuon ang GSO kaupod sa DPWH CENRO kag mga experts gikan sa University of the Philippines-Visayas (UPV) agud mahibaluan ang baiodiversity sa lugar.
Ang nasambit nga isla nahuman paagi sa pagtipon sang lay-on sa mga gamut sang mangroves tubtob nga naglapad kag ginatindugan na sang sari sari nga variety sang mangroves kag ginapuy-an sang mga pispis kag iban pa nga kasapatan.
