May yara sang isa ka istorya sa Bolivia nga duha ka beses gid nga nabutang sa ital-ital ang kabuhi sang lima ka tawo, apang milagro lamang nga nakaluwas sila tanan.
Myerkules sang nagbyahe ang lima sakay sa eroplano halin sa Bolivian village sang Baures kag pakadto kuntani sa Trinidad para sa isa ka medical check-up sa anum ka tuig nga bata.
Samtang yara na sa Amazonas region, hinali lang nga nadula ang eroplano sa radar sang Beni Department. May natabo gali nga engine failure rason nga ginpili sang piloto nga magpatigayon sang emergency landing sa Itanomas River.
Apang ano man nga kamalason bangud nakaluwas matuod sila sa posible nga pag-crash sang eroplano, apang halos indi sila makaginhawa sang natalupangdan nila kun sa diin sila naghugpa.
Suno sa piloto nga si Pablo Andrés Velarde, 27, nakit-an nila nga napalibutan sila sang mga buwaya nga halos tres metros na lang ang distansya halin sa eroplano. Halos makurog sila sang kakulba sang may nasiplatan nga may anaconda pa gid sa tubig.
Bangud nabutang sa peligro ang ila kabuhi, ginpili nila ang magtinir anay sa eroplano kag indi magguwa.
Tatlo ka mga babaye, isa ka bata nga anum ka tuig, kag ang piloto ang yara sa plane suno sa Beni Department emergency operations center.
Bangud na-detect naman nga nadula sila sa radar, ginpatigayon ang search and rescue mission. 36 oras pa ang ginlawig antes sila nakit-an sang rescuers sa bulig sang isa ka manugpangisda nga amo ang nakasiplat sa aircraft.
Suno sa awtoridad, posible nga wala nakapalapit ang mga buwaya bangud may yara sang petrol nga naga-leak halin sa eroplano, apisar nga wala man sang scientific proof nga nagapahayag nga isa ini ka effective alligator repellent.
Samtang didto nagahulat sang rescue, nagkaon ang lima sang cassava flour nga dala sang isa ka pasahero, apang gin-agwanta lang anay nila ang kauhaw bangud sa kahadlok nga kan-on sila sang buwaya kun magguwa sila sa aircraft.
Sa subong, yara pa sa ospital ang isa ka babaye bangud sa pilas sa iya nga ulo. Na-discharge naman ang iban kag naga-recover na sa dehydration, minor chemical burns, infected cuts, bruises kag insect bites sa madamo nga parte sang ila lawas.
