Ginpagwa na sang Philippine National Police-Aviation Security Group (PNP-AVSEGROUP) ang resulta sang autopsy sang duha ka biktima sa natabo nga aksidente sa Ninoy Aquino International Airport (NAIA), kag ginkumpirmar nga blunt force trauma ang rasun sang ila kamatayon.
Suno sa report, isa sa mga biktima amo ang 29-anyos nga lalaki nga may pilas sa ulo kag spinal cord, samtang ang isa pa nga biktima, isa ka menor de edad, ginreport nga may pilas sa ulo kag sa wala nga bahin sang lawas.
Una nga ginpaidalom sa testing ang suspek sa likod sang insidente apang negatibo ini sa alcohol kag ilegal nga droga.
Sa subong, yara na sa Mobile Patrol Security Unit Detention Facility ang suspek kag magapangatubang sang kaso nga reckless imprudence resulting in homicide, multiple physical injuries, kag damage to property.
Ginpasiguro naman sang Aviation Security Group nga ila ginahimo ang tanan agud matutukan ang imbestigasyon kag maghatag hustisya sa pamilya sang mga napatay.
