Nalipay si former President Rodrigo Duterte sang nahibaluan sini nga nagdaog siya sa iya pagpadalagan bilang alkalde sa Davao City.
Suno ini sa iya utod nga si Bong Duterte nga nagbisita sa anay punong ehekutibo sa detention facility sa The Hague, Netherlands.
“He’s very happy when I told him we got an overwhelming vote as mayor. He smiled,” suno kay Bong sa Facebook live video ni former Presidential spokesman Harry Roque.
Pahayag pa sang manghod sini, maayo ang kondisyon sang former president, kag nagapasalamat ini sa iya nga supporters lakip na ang mga yara sa The Hague nga nagatipon para sa iya.
“He would like to thank all those who supported him… I told him merong mga tao sa park,” suno kay Bong. “From the bottom of his heart talagang nagpapasalamat siya sa mga sumuporta sa kanya not only sa park, world wide.”
Matandaan nga opisyal na nga ginproklamar sang Davao election board nga nagdaog si Duterte sa mayoral race nga nakakuha sang masobra 660,000 ka mga boto sa iya hometown.
Bangud didto siya naka-detain sa Netherlands, ginalauman nga ang iya bata nga si incumbent Sebastian “Baste” Duterte amo man gihapon ang magapungko nga mayor bangud siya ang na-eleher nga bise-alcalde.
Marso 11 sang gindakop si Duterte sa gahum sang arrest warrant sang International Criminal Court (ICC) bangud sa ginaalegar nga crimes against humanity. Sa Septyembre 23 naka-schedule ang confirmation of charges.#
