Direkta nga nagsabat sang “no” si retired Sandiganbayan Presiding Justice Amparo Cabotaje-Tang matapos ginsuhestyon sang defense lawyer ni Vice President Sara Duterte nga mahimo niya i-withdraw ang iya testimonya sa Senate impeachment trial.
Natabo ini samtang nga naga-cross-examine si Atty. Mark Vinluan, isa sa mga abogado sang defense, kay Tang bilang una nga witness sang prosecution para sa Article Two sang Articles of Impeachment nga naangot sa unexplained wealth sang bise presidente.
Ginpamangkot sang defense si Tang parte sa iya desisyon nga magtestigo sa impeachment court, ilabi na bangud sang iya nauna nga pahayag nga “unethical” para sa isa ka retirado nga mahistrado nga mag-atubang sa mga kaso nga pending pa sa Sandiganbayan.
Nag-object naman si prosecution counsel kag Akbayan party-list Representative Atty. Chel Diokno sa linya sang pagpamangkot ni Vinluan.
Suno kay Diokno nga amo ang lead prosecutor sa Article II, maathag nga nasiling na sa puno nga nagkadto lang si Cabotaje-Tang bilang testigo bangud nga gin-subpoena siya sang korte kasunod sang request sang prosekusyon.
Ginpasugtan ang retired justice nga magsabat. Pahayag sini, kun siya lamang ang papilion, indi siya mag-atubang sa impeachment court kun wala sang subpoena.
“Well, given the choice, I would not have come here without the subpoena,” pahayag sang retired justice.
“You can withdraw your testimony, would you want to do that?” sabat sang defense lawyer.
“No, sir, I’m already here,” pahayag naman ni Cabotaje-Tang.
“You’re already here. Sayang naman, ma’am,” dugang ni Vinluan.
Sa iya pagtestigo kahapon, ginpamangkot man siya sang defense kon nakabaton siya sang bayad para sa iya testimonya kag kun kontra siya sa mga Duterte.
“I will never testify if ever I was offered anything, material or otherwise. My testimony is not for sale,” suno kay Cabotaje-Tang.
Ginkwestyon man ni Vinluan si Cabotaje-Tang agud mabisto kun may political leaning ini. Lakip sa mga kwestyon amo kun mag-abyan ang retired justice kag si Diokno.
“But are you anti-Duterte? Do you like VP Sara? Kakampink po ba kayo?” kabahin sang isa-isa nga pamangkot sang defense lawyer.
Ginpanindugan naman ni Cabotaje-Tang nga “apolitical” siya halin sang una, kag sa pagkamatuod, nagkontrahanay pa sila sang una ni Diokno sa mga kaso sa korte.
“I don’t know her personally… I’ve never been political in my life. I have always been apolitical,” kabahin sang mga sabat sang testigo.#
