Gin-athag sang isa ka human rights lawyer nga indi pa pinal kag executory ang pag-nullify sang Court of Appeals (CA) sa pag-abswelto kay Congresswoman-elect Leila de Lima sang Muntinlupa Regional Trial Court (RTC) Branch 204 sa kaso nga conspiracy to commit illegal drug trading.
Sa interview sang Bombo Radyo kay Atty. Joebert Pahilga, human rights lawyer, iya ginpahayag nga mahimo pa nga maka-file sang motion for reconsideration si de Lima sa tion sang mabaton sini ang panumbungon sa sulod sang kinse ka adlaw.
Suno kay Pahilga, kon yara na sa Supreme Court ang kaso, mahimo na sini nga i-assess kon ang nangin desisyon sang RTC ang compliant sa deriktiba sang konstitusyon.
Ginpahayag man sini ang amo nga kaso ang indi na magsulod sa ‘double jeopardy’ nga nagakahulugan nga ang isa ka indibidwal indi mahimo nga kasuhan sang makaduha para sa pareho nga offense pagkatapos sang isa ka valid conviction ukon pag-abswelto.
Ini bangud nga suno sa CA, void ukon wala sang bisa ang desisyon nga gin-render sang RTC bangud wala ini nag-comply sa requirements sang konstitusyon.
Kon patpaton, sa 12-pahina nga desisyon, ang Eighth Division sang Court of Appeals ang nag-grant sang petisyon sang Office of the Solicitor General para sa certiorari kag nagmando nga ibalik ang kaso sa Branch 204 sang Muntinlupa RTC para sa dugang nga mga paghusay.
Gin-abswelto sang Muntinlupa RTC sanday De Lima kag Dayan sa isa ka desisyon sang Mayo 12, 2023, nga nagasambit sang pagbawi sang testimonya sang anay hepe sang Bureau of Corrections nga si Rafael Ragos, nga suno sa korte naghimo sang reasonable doubt.
Ginpanghiwala man sini ang appeal sang prosekusyon sang Hulyo 6, 2023, nga nagapadaku nga ang mga pag-abswelto mangin pinal upon promulgation.
Apang, nakita sang appellate court nga ang RTC napaslawan sa pagtumod sang importante nga mga detalye sa amo nga desisyon—subong sang kon diin sa mga pahayag ni Ragos ang ginbawi, kon paano ang mga pagbawi nakaapekto sa kaso sang prosekusyon, kag kon ano nga elemento sang krimen ang wala napamatud-an.
Nahibaluan nga napreso si De Lima sa sulod sang pito ka tuig bangud sa panumbungon sa iligal nga druga sa idalum sang administrasyon ni Former President Rodrigo Duterte. Ginhilway siya sang Nobyembre 2023
