Ginpahayag ni Vice President Sara Duterte nga bisan pa nga nagahimo na sang pamaagi ang iya mga abogado nga malikawan ang impeachment trial, mas gustuhon pa niya nga madayon ini bangud luyag niya sang isa ka “bloodbath” ukon madugo nga proseso.
Suno kay VP Duterte, yara na sa full throttle ang preparasyon para sa impeachment.
Ginschedule na ni Senate President Chiz Escudero ang pagsugod sang impeachment trial sa Hulyo 30 sini nga tuig agud ma-accommodate ang 12 ka bag-o nga mga senador nga napilian sa 20th Congress.
Ini nga mga bag-o nga senador, upod sa 12 ka mga incumbent halin sa 19th Congress ang magapungko bilang mga huwes sa trial nga posible magresulta sa pagpahalin kay Duterte sa iya puwesto kag makapaguba sang iya plano nga magpadalagan sa pagka-presidente sa 2028.
Suno kay Duterte, kuntento siya sa kun ano man ang maging resulta sang impeachment, kag handa man siya sa bisan ano nga desisyon sang Senado.
Madumduman nga nagsumiter si Duterte sang petisyon sa Korte Suprema nga ginakwestyon ang legalidad sang ika-apat nga reklamo batok sa iya.
Suno sa iya, ginlapas sang House of Representatives ang “one-year bar” sang 1987 Constitution nga nagadumili sang sobra isa ka mpeachment proceeding batok sa amo man nga opisyal sulod sang isa ka tuig.
Sa resulta sang midterm elections, tatlo lang sa “Duter10” candidates ang nakasulod sa Magic 12, samtang nakuha ni Senador Imee Marcos kag Las Piñas Rep. Camille Villar ang ila mga pwesto.
Kinahanglan ni Duterte sang siyam ka boto nga pabor sa acquittal agud mapabilin sa puwesto.
