Nagapabilin sa Pilipinas ang International Boxing Federation (IBF) minimumweight title matapos liwat nga ginlutos ni Pedro Taduran ang Japanese boxer nga si Ginjiro Shigeoka.
Nagdaog ang Pinoy boxer paagi sa split decision subong nga Sabado sa sambuwa nga ginpatigayon sa Osaka, Japan.
Duha ka judges ang nagpabor sa defending Filipino world champion, 118-110, 115-113; kag isa naman ang nagpabor sa Japanese, 113-115, matapos ang 36 minutos nga hampang.
Samtang nagaselebrar si Taduran, nakit-an naman sa live feed nga nalipong si Shigeoka, apang sang ulihi na-umpawan man, nagpamahid sang iya nawong, kag ginsakay ini sa stretcher pagguwa sa ring.
Ginpatigayon ini nga rematch 10 ka bulan matapos ang kadalag-an sang Pinoy paagi sa ninth-round stoppage sang una sila nga nagkitaay sa Otsu sa Hulyo 2024.
Nagsaka na sa 18-4-1 ang record ni Taduran nga may 13 knockouts.
Posible nga ang masunod para sa Pinoy fighter amo ang unification fight batok sa Puerto Rican nga si Oscar Collazo nga amo ang naga-uyat sang paha sa WBA kag WBO.
Indi na bag-uhan si Collazo sa pag-atubang sa Pinoy sa world title clash. Undefeated siya sa 12 fights nga may siyam ka knockouts, kag lakip sa iya nalutos amo si Melvin Jerusalem sang Mayo 2023 para sa WBO strap.
