Nagpahayag si United States President Donald Trump nga nagbuang na gid si Russian President Vladimir Putin.
Reaksyon ini sang presidente matapos ginlunsar sang Russia ang aerial attack nga amo ang ginakabig pinakadaku sini nga atake sa Ukraine sa sulod sang tatlo ka tuig nga gyera.
“I’ve always had a very good relationship with Vladimir Putin of Russia, but something has happened to him. He has gone absolutely CRAZY! He is needlessly killing a lot of people, and I’m not just talking about soldiers. Missiles and drones are being shot into Cities in Ukraine, for no reason whatsoever,” post ni Trump sa Truth Social.
Sa separado nga pahayag, ginsiling sini nga maayo man kuntani ang ila relasyon ni Putin, apang wala siya nakahibalo kun ano na ang natabo diri.
Dugang sang US leader, wala sang kaluoy ang Russian president sa pagpamatay sa mga tawo kag pagpadala sang mga missiles kag drones sa Ukraine bisan wala man siya sang rason nga himuon ini.
“I’m not happy with what Putin is doing. He’s killing a lot of people, and I don’t know what the hell happened to Putin,” dugang sini.
Byernes, Sabado, kag Domingo nga sunod-sunod nga atake ang ginhimo sang Moscow nga nagpatay na sang 29 ka mga tawo.
Sandig sa Ukrainian air force, 355 drones kag siyam ka cruise missiles ang ginpadala sang Moscow sang nagligad nga gab-i nga amo subong ang largest drone attack nga ila nahimo sa Ukraine halin sang 2022.
