Natigayon nga ma-deport sa China ang ginabulubanta 100 ka mga Chinese nationals nga nagatrabaho sa Philippine Offshore Gaming Operators (POGOs).
Suno sa Presidential Anti-Organized Crime Commission (PAOCC), ginsabat sang China ang pamasahe sa eroplano sang mga gin-deport agud masiguro nga indi na sila makapalagyo.
Apisar nga yara ang mga ini sa China, padayon sagihapon nga ipaidalom sa imbistigasyon sa scamming, cybercrime, fraud, kag money laundering.
Gin-aresto ang mga nasambit nga mga indibidwal sa anti-POGO operations sa Cebu, Cavite, Parañaque, kag Pasay, kun sa diin ginpangdeklarar ang mga ini nga undesirable aliens bangud nga wala sila sang visa kag work permits sa pagtrabaho sa iligal nga mga POGO.
Ginkumpirmar man nga gin-blacklist na ang mga Chinese Nationals kag indi na makabalik sa Pilipinas.
Sa subong, naglab-ot na sa halos 4,000 ka mga POGO workers ang naaresto, samtang 2,500 naman ang mga na-deport.
