Siling nila, ang mga ido gid man ang makabig nga pinaka-loyal nga abyan sang tawo kag ini ang ginpamatud-an sang isa ka estudyante kag sang iya ido didto sa Cagayan.
Nasaksihan sang mga tawo ini nga makatalandog-balatyagon nga eksena sa Tuguegarao, Cagayan sang isa ka senior high school graduate ang gin-updan sang iya hinuptanan nga ido sa pinakaespesyal nga adlaw sang iya kabuhi.
Sa baylo nga ginikanan ang mag-upod sa iya sa graduation, ang hinuptanan nga ido nga si Browny ang nangin kaupod ni Jamaica Cabral.
Ang litrato kag video nila nga magkaupod sa seremonya nag-viral matapos ipost sa social media.
Bisan pa man masubo nga wala sang pamilya nga present, ginpabatyag ni Jamaica nga wala siya nagaisahanon — si Browny ang iya padayon nga kaupod sa kabudlayan kag kalipay.
Sang ginlawag na si Jamaica sa entablado, nag-behave lang si Browny kag nag-upod pa sa iya, daw kaangay sang isa ka suod nga abyan nga nagapakita sang suporta.
Gintugutan man sang mga school staff ang presensya ni Browny bangud wala ini nagatuga sang problema kag nagpakita sang husto nga pamatasan.
Nagbilib naman ang mga tawo bangud sa espesyal nga pagpalangga sang estudyante kag sang iya ido sa isa kag isa.
