Na-rescue na ang 13 ka seafarers nga duha ka bulan nga na-stranded sa isa ka international cargo vessel nga MV Hirman Star nga naka-angkorahe sa Loboc Port, Lapuz, Iloilo City.
Ini nga seafarers ginalakipan sang anum ka mga Pinoy kag pito ka Indian nationals. Sa anum nga Filipino crew members, tatlo ang taga-Iloilo nga naghalin sa mga banwa sang Tigbauan, San Joaquin, kag Estancia; samtang ang tatlo ka iban pa ang naghalin sa Batangas, Cebu, kag Manila.
Natabo ang rescue operation matapos nga nagpangayo sang assistance ang crew paagi sa pagsulat kay Iloilo City Lone District Representative Julienne “Jam” Baronda sang Hunyo 28.
Ginsiling nga nag-abot ang barko halin sa Vietnam nga may karga nga mga bugas sang Agusto 2024, apang nagpabilin ini nga naka-angkorahe sa Loboc bangud nakit-an sa inspeksyon sang Philippine Coast Guard kag Port State Control nga expired na ang trading certificate kag indi pa maayo ang kondisyon sang foreign vessel.
Abril sang gin-lift ang detention order kag may port clearance nga gin-isyu sang May 7, apang sa pre-departure check, na-diskubrehan sang crew nga non-functional sa gihapon ang gyro compass.
Suno sa crew, wala sila nakabaton sang food and water supplies halin sang May 12 kag wala man nabayaran ang Indian seafarers sa sulod na sang tatlo ka bulan.
Bangud sini, nag-request sang assistance si Baronda sa Department of Migrant Workers (DMW), Overseas Workers Welfare Administration (OWWA), Philippine Coast Guard, Bureau of Customs, Bureau of Immigration, Maritime Industry Authority, kag crewing agency agud nga mapatigayon ang rescue.
Naghatag ang DMW kag ang OWWA sang P100,000 nga financial aid para sa na-rescue nga crew members.
Suno kay Baronda, natalana man nga magpaidalom sa debriefing and medical assessments ang seafarers subong nga adlaw. Gina-facilitate man nga makapauli na ang mga Indian nationals sa ila pungsod.#
*Photo: Jamjam Baronda/FB
