Makaguwa na sa ospital subong nga adlaw, Hulyo 1, si former Negros Oriental Representative Arnolfo Teves Jr. matapos nagpaidalom sa emergency appendectomy sang Hunyo 18.
Suno sa iya abogado nga si Ferdinand Topacio, magabalik na ang kongresista sa iya selda nga nahamtang sa Annex 2 sang Bureau of Jail Management and Penology (BJMP).
Dugang ni Topacio, apisar nagabatyag pa si Teves sang kasakit sa tiyan, ginbaton niya ang clearance nga magaguwa na ini sa ospital kag magabalik sa iya selda agud nga maghipos na ang sala kag malisyoso nga mga kritiko.
Nagpasalamat man si Teves sa mga doktor nga nag-atipan sa iya sang maayo samtang yara siya sa ospital, kag sa tanan nga nagpalab-ot sang mensahe para sa iya pag-ayo.
Padayon nga pagabantayan ang iya kahimtangan sa Annex 2 agud masiguro ang iya ikaayong-lawas.
Matandaan nga Hunyo 17 sang na-ospital si Teves nga nagresulta sang rekomendasyon para sa “major surgery.”
Nahibaluan nga si Teves ang ginatudlo nga utok sa pagpatay kay anay Negros Oriental Gov. Roel Degamo kag iban pa sang Marso 2023. Magluwas diri, gina-akusaran man sa iya sa iban pa nga kaso sang pagpatay sa amo nga probinsya kag gin-tag man bilang terorista.#
