Isa ka buwaya ang ginpakaslan sang alkalde sa banwa sang San Pedro Huamelula sa Oaxaca, Mexico bilang kabahin sang isa ka masobra 200 ka tuig na nga tradisyon nga nagasimbolo sang koneksyon sang tawo kag palibot sini.
Makita sa seremonya ang buwaya nga nagsuksok sang puti nga bayo pangkasal samtang ginhalukan ini ni Mayor Daniel Gutierrez sa atubang sang mga pumuluyo.
Sa ritwal, ginakilala ang mayor bilang hari sang tribo nga Chontal, samtang ang buwaya naman ang ginakabig nga prinsesa sang mga Huave.
Antes sang kasal, ang buwaya ang ginparada pa palibot sa banwa kag ginpakilala sa kada panimalay.
Ginasugata siya sang mga pumuluyo nga may hakos, nagsaot sila, kag nagkinalipay.
Para sa safety sang tanan, ginhigtan ang baba sang buwaya.
Ginpasuksok ini sang puti nga bayo pangkasal antes dal-on sa town hall para sa opisyal nga seremonya.
Gintapos ang kasal sa paghalok sang mayor sa baba sang buwaya.
Pagkatapos sang seremonya, nagsaot ang mayor kag ang buwaya sa tono sang tradisyunal nga musika.
Suno sa mga local nga mga pumuluyo, ang ini nga sahi sang kasal nagadala sang maayo nga ani kag madamo nga mga hulik halin sa kadagatan.#
