Ginatutukan sa bulan sang Hulyo ang selebrasyon sang National Cleft Lip and Craniofacial Awareness Month bilang kabahin sang kampanya sa pagpasangkad sang kaalam parte sa cleft lip kag cleft palate, mga kondisyon nga ginakabig congenital nga may deperensya sa baba kag ngala-ngala.
Sa exclusive interview sang Bombo Radyo kay Dr. Gabriel Tecson, isa ka espesyalista sa ENT – Head and Neck Surgery, ginpahayag nga ang cleft lip kag cleft palate isa ka congenital nga balatian.
Nagakatabo ini samtang ginabusong pa ang bata, kung sa diin indi nagaporma sang husto ang mga istruktura sang nawong, labi na ang bibig kag ngala-ngala.
Ang cleft lip nagaresulta sang gisi sa tuo o wala nga bahin sang bibig, kag may mga kaso man nga duha ka bahin ang apektado.
Samtang ang cleft palate naman amo ang buho sa ngala-ngala, nga nagahatag sang kabudlay sa pagkaon, paghambal, kag makadala sang komplikasyon kun indi dayon maoperahan.
Sa Pilipinas, may yara sang pilakalibo ka kaso kada tuig, ilabi na sa mga lugar nga kulang sa serbisyo medikal antes magbata ang mga iloy.
May yara sang epektibo nga mga pamaagi para masolusyunan ang cleft lip kag cleft palate kag ginahimo ang operasyon sa cleft lip sang bata nagaedad 3 tubtob 6 ka bulan.
Ang operasyon para sa cleft palate ginahimo antes pa magsugod ang kabataan sa paghambal sang mga tinaga, sa edad nga 9 tubtob 18 ka bulan.
Ginapangunahan sang mga eksperto nga naga-upod ang mga espesyalista sa Ear, Nose, and Throat (ENT) specialist, plastic surgery, pediatrics, dentistry, kag speech therapy ang pag-atipan sa mga pasyente nga may cleft condition.
Ang selebrasyon sang National Cleft Lip and Craniofacial Awareness Month nagapadayon nga isa ka importante nga panawagan sa publiko agud maghatag suporta, magbulig sa pagpalapnag sang kasayuran, kag magpakita sang paghangop sa mga kabataan kag pamilya nga nagaatubang sang amo nga kondisyon.
