Kinahanglan sang Ukraine ang mga Patriot missile systems suno kay U.S. President Donald Trump, agud mapabakod ang ila depensa batok sa padayon nga mga atake sang Russia.
Ini nga pahayag ang ginpaguwa ni Trump matapos ang pag-estoryahanay nila ni Ukrainian President Volodymyr Zelenskiy.
Suno kay Zelenskiy, naestoryahan na nila ni Trump ang pagpabaskog sang air defense capabilities sang Ukraine, lakip na ang joint production, pagbakal, kag ang pag-invest sang defense military.
Dugang pa niya, may yara na sang mga nakaplano nga pagsinapol agud estoryahan ang mga detalye sang nasambit nga mga plano.
Samtang, nagpaguwa naman sang warning ang Kyiv nga possible maghina ang ila depensa matapos nga ginpa-untat sang US ang ila pagpadala sang armas.
Suno sa report, may yara na sang paglaum kag sugilanon sa tunga nanday Trump kag Zelenskiy nga possible mapadayon ang supply sang mga missiles matapos ang ila 40 ka minutos nga pag-estoryahanay.
Madumduman nga una na nga nakabaton ang Ukraine sang Patriot systems halin sa Amerika bilang kabahin sang military aid sa idalom sang anay administrasyon ni Joe Biden.
