Ginkumpirma sang Philippine National Police (PNP) nga ang whistleblower sa kaso sang missing sabungeros ang yara na sa idalom sang protective custody sang kapulisan.
Suno kay PNP chief Police General Nicolas Torre III,naga-apply man ang whistleblower para sa Witness Protection Program bangud kun mag-qualify, i-turn over ini sa Department of Justice.
Pahayag ni Torre, sa subong, mahapos nalang ini kag kay Justice Secretary Jesus Crispin ‘Boying’ Remulla na ang may pinal nga desisyon sa iya nga protection.
Samtang, ang 15 ka mga pulis nga gin-ulamid sang whistleblower sa pagkadula sang mga sabungero ang yara subong sa restrictive custody sa Camp Crame sa Quezon City.
Matandaan nga may yara sang pito ka mga pulis ang may kaangtanan sa pag-kidnap sa mga sabungero ang nauna na nga na-dismiss sa serbisyo sang Enero 2023.
Ginpahayag man ni Torre nga may impormasyon nga ang pila sa mga pulis nga ini ang nakabaton sang P2 million nga ‘payola’ kada bulan halin kay Atong Ang, isa sa mga ginatudlo nga may dako nga papel sa pagdumala sang pagpang-kidnap, base sa gintuad sang whistleblower.
Sa subong, padayon pa ang imbestigasyon sang PNP sa iban pa nga mga personalidad nga ginapasuni nga may koneksyon sa insidente kag ginapangita man ang ila lokasyon.
Nahibaluan nga naglab-ot sa 34 ka mga sabungero ang na-report nga nadula halin sang tuig 2021 tubtob 2022.
Suno sa mga otoridad, ang mga nadula ang ginpang-kidnap bangud sa match fixing.
Gintuad sang whistleblower nga ang mga biktima ang ginpangtagbong na sa Taal Lake.
Ginapasiguro man ni Torre nga padayon ang ila imbistigasyon kag nagapati ini nga possible may iban pa nga mga lugar nga gihabuyan sang mga lawas sang biktima.
Nakabaton man sila sang impormasyon nga iban sa mga lawas sang mga sabungero ang ginpangsunog.
