Ginalauman nga makabalik sa Pilipinas sa Hulyo 11 ang 17 ka mga Pinoy seafarers nga sakay sang MV Magic Seas nga nakaluwas matapos gin-atake sang Houthi rebels.
Sandig ini sa kumpirmasyon ni Department of Migrant Workers (DMW) Secretary Hans Cacdac subong nga gab-i, Hulyo 9.
Sa subong suno sa tiglikom, gina-akomodar anay ang seafarers sa isa ka hotel sa Djibouti sa East Africa.
Una na nga gin-report sang DMW nga may Filipino seafarers kag duha ka iban pa nga crew members nga nakaluwas sa Liberian-flagged vessel nga ila ginsakyan sang gin-atake ini sang Houthi rebels sang Sabado.
Sang amo nga adlaw, may mga lalaki nga may dala nga automatic weapons kag rocket-propelled grenades nga nagsaka sa MV Magic Seas sang yara ini sa ginabanta 51 nautical miles southwest sang Hodeidah.
Sa pihak nga bahin, sa report man sang DMW, nalakip ang sitwasyon sang Greek-operated bulk carrier nga Eternity C nga may 22 ka sakay kun sa diin 21 ang mga Pinoy kag isa ang Russian.
Lima sa 22 crew members ang gin-atake sang Lunes apang na-rescue suno sa ahensya. Natalana pa lamang nga ikumpirma sang DMW ang reported fatalities sa Eternity C bangud nagapadayon pa ang rescue operations.#
MV Magic Seas. (Photo grabbed from vesselfinder.com)
