Ginduso ang isa ka resolution sa Kamara agud i-nominate sa Order of National Artists ang Comedy King nga si Rodolfo “Dolphy” Quizon, Sr.
Si Manila 3rd District Rep. Joel Chua ang nag-file sang House Resolution No. 41 kahapon, Hulyo 9, isa ka adlaw antes ang 13th death anniversary sang anay aktor.
Nakasulat sa resolution ang “magnificent body of work” ni Dolphy kag ang iya pagtib-ong sa Filipino values para sa tanan nga henerasyon sang mga Pinoy.
Ang National Artist amo ang pinakamataas nga national recognition nga ginahatag sa mga indibidwal nga may daku nga kontribusyon sa arts and culture sang Pilipinas.
Sa amo nga resolution, ginahingyo ang House committees on Creative Industries kag ang Basic Education & Culture nga magpatigayon sang hearings kag iban pa nga mga tikang agud pormal nga ma-nominate si Dolphy sa National Commission for Culture and the Arts.
2012 sang nagtaliwan si Dolphy bangud sa multiple organ failure.
Popular siya bilang “King of Comedy” nga nakit-an sa tuman ka damo nga iconic shows kaangay sang long-running shows nga “John en Marsha” kag “Home Along da Riles” amo man sa mga pelikula nga “Omeng Satanasia” kag “Markova Comfort Gay.”
Masobra anum ka dekada ang ginlawig sang iya karera sa entertainment industry bilang komedyante, indi lamang sa telebisyon kag sa pelikula kundi mangin sa entablado kag sa radio.#
