Ginkumpirma sang Palestinian militant group nga Hamas nga nagpasugot sila nga hilwayon ang 10 ka Israeli nga mga bihag bilang kabahin sang kasugtanan sang ceasefire sa Gaza.
Sa statement sang grupo, ginsiling sini nga magapadayon sila sa nga tikang para nga magmadinalag-on ang negosasyon kag malab-ot ang kumprehensibo nga kasugtanan nga amo ang ginalantaw nga magatapos na sang gyera sa Gaza Strip.
Luyag man sang Hamas nga makasulod na ang humanitarian aid sa Palestine kag mapahagan-hagan ang pag-antos sang mga residente sa amo nga teritoryo.
Suno pa sa militante nga grupo, padayon pa subong ang diskusyon kaangot sa pagpasulod sang ayuda, pag-atras sang Israel forces halin sa Gaza, kag garantiya sang permanente nga ceasefire.
Nahibaluan nga pareho nga may mga tiglawas ang Israel kag Hamas sa Doha, Qatar para sa negosasyon agud matapos na ang gyera nga nag-umpisa sang Oktubre 2023 nga nagpatay na sang masobra 57,000 ka mga tawo.
