Nagapanawagan ang Western Visayas Transport Cooperative (WTVC) nga dapat ma-aburahan na ang P1 ukon P2 nga dugang sa plete kasunod sa liwat nga pagtimbuok sang presyo sang mga produktong petrolyo.
Sa interview sang Bombo Radyo kay Raymundo ‘Boyet’ Parcon, iya ginpahayag nga subong nga mga tion, tuman ka pigado ang byahe apisar nga madamo ang mga pasahero.
Ini bangud, suno kay Parcon, nga nagadaku liwat ang ila gasto sa diesel kun sa diin nagalab-ot sa 40 litros ang ila ginatughong sa kada unit.
Pahayag niya, may yara sang P12 nga fuel subsidy nga ginahatag ang gobyerno apang may yara sang tion nga nagaka-delay ang pagbayad sa mga gasolinahan rason nga indi tayuyon ang ila nga mga ayuda.
Ginpahayag pa ni Parcon, bangud sa nagapadayon nga pagsaka sang presyo sang petrolyo, indi na igo ang fuel subsidy bilang long-term nga solusyon kag ginakabig bilang band-aid solution lamang.
Ginapanawagan sa karun sang kooperatiba nga dapat na ma-approve ang P1 ukon P2 nga dugang sa plete.
Apang, tubtob subong wala sa gihapon ini ginapamatian sang gobyerno.
Dugang pa niya, ila ginakabalak-an nga kun magpadayon ang pagsaka sang presyo sang diesel kag maglab-ot ini sa P100 kada litro, posible nga magabalik na naman ang pagbiyahe sa porsyentuhanay, amo man ang pag-untat sang byahe sang iban nila nga mga unit.
