Ginpanawagan sang kampo ni anay Presidente Rodrigo Duterte nga untaton na sang International Criminal Court ukon ICC ang imbestigasyon sa kaso nga ‘crime against humanity’ batuk sa iya, bangud sang ginapangatubang nga isyu sa jurisdiction sang korte.
Sa dokumento nga ginsumiter sang Hulyo 10, ginpangabay sang mga abogado ni Duterte nga sanday Nicholas Kaufman kag Dov Jacobs sa Pre-Trial Chamber I sang ICC nga ihunong ang proseso kag ipagluwas si Duterte nga wala sang kondisyon.
Ginpahanumdom sang depensa ang ila una nga argumento nga ginpresentar pa sang Mayo 1, kag ginkontra nila ang posisyon sang prosecution sang Hunyo 10 nga nagaangkon sang legal nga basehan kag ebidensya sa pagpangusisa.
Suno sa depensa, naulihi ang pagpagwa sang mga importante nga dokumento halin pa sa preliminary examination phase, nga ila ginakinahanglan para sa ila jurisdictional challenge.
Gin-akusar man nila nga ini nga pagka-ulihi indi lang kapaltahan kundi isa ka kapabayaan nga nagaapekto sa ila preparasyon kag posible nga nakaimpluwensiya sa mga mosyon.
Ginkwestyon man sang depensa ang interpretasyon sang prosecution sa Article 12(2) sang Rome Statute, nga nagatuyo kung san-o may hurisdiksiyon ang korte.
Sa karon, wala pa sang pinal nga desisyon ang ICC sa panibag-o nga hiling sang kampo ni Duterte.
