Negative ang sabat ni Philippine Coast Guard (PCG) Southern Tagalog Commander Geronimo Tuvilla sang ginpamangkot angot sa posibilidad nga may nakuha sila nga ebidensya may kaangtanan sa pagkadula sang mga manugbulang sa Taal Lake.
Sa ikatatlo nga adlaw sang search kag retrieval operations sang PCG kahapon, Hulyo 13, napaslawan ang mga katapo sang ahensya nga maka-recover sang bag-o nga ebidensya halin sa lawod.
Suno kay Tuvilla, padayon ang ila operasyon kag ila pa pasangkaron ang area sang ila operasyon nga mas lapad pa sa una nga “ground zero.”
Ginklaro man niya nga indi mag-untat ang ila team tubtob nga indi nila malab-ot kag ma-cover ang bug-os nga circumference sang ila search area.
Matandaan nga ginbuyagyag sang isa ka whistleblower nga si Julie Patidongan alyas “Totoy” nga ginpatay ang mga nadula nga manugbulang kag ginhaboy ang ila mga bangkay sa Taal Lake.
Samtang, padayon ang pagpanawagan sang pamilya sang mga biktima sa mga otoridad nga mapadasig ang hustisya kag matukiban ang kamatuoran sa likod sang kontrobersyal nga kaso.
