Pareho nga may posibilidad nga mangin bagyo ang duha ka low pressure areas (LPAs) nga lunsay yara sa sulod sang Philippine Area of Responsibility (PAR).
Suno sa state weather bureau, ang isa ka LPA ang may mataas na nga potensyal nga mangin tropical depression sa masunod nga 24 oras.
Ulihi ini nakit-an sa kalayuon nga 1,175 km nasidlangan sang Central Luzon.
Sa pihak nga bahin, may medium chance naman nga mangin bagyo man ang LPA nga nasiplatan sa kalayuon nga 385 km nasidlangan sang Calayan, Cagayan.
Padayon nga nagapaandam ang weather bureau nga magadala sang pag-ulan ang Southwest Monsoon ukon ang Habagat sa madamo nga parte sang Pilipinas.
Mangin magal-umon sa Visayas kag may lapta-lapta nga pag-ulan kag thunderstorms suno pa sa update sang PAGASA.
Sa anunsyo naman ni Mayor Raisa Treñas kagab-i, maga-resume na ang klase sa Iloilo City subong nga adlaw, Hulyo 22.
Sa probinsya naman, kanselado ang face-to-face classes sa banwa sang Oton subong nga adlaw sa tanan nga lebel sa pampubliko kag pribado nga eskwelahan. Sandig sa local government, ginpaiway ang klase bangud sa malain nga tyempo dala sang Habagat kag nagapabilin nga ginabaha ang pila ka mga dalan sa banwa.#
