Ginakonsiderar sang Association of Barangay Captains – Lapuz District nga idangop sa National Police Commission (NAPOLCOM) ang isa ka police personnel nga nakit-an sa CCTV footage nga naghaboy sang botelya samtang naga-inom sa tunga sang dalan sa Brgy. Rizal Lapuz Sur.
Ang pulis may duwa ka upod nga lalaki base man sa nakita sa footage.
Sa interview sang Bombo Radyo kay Arnel Asturias, presidente sang nasambit nga asosasyon, iya ginpahayag nga dako ang iya pagkadismaya bangod sa baylo kuntani nga mangin maayo nga ehemplo ang pulis, ini pa ang nagpanguna sa buluhaton nga indi maayo sa komunidad.
Nahibaluan nga makita sa CCTV footage nga nagainom‑inom ang pulis kag ang iya sini upod nga duwa ka lalaki, kag una gid ang pulis naghaboy sang botelya sa tunga sang karsada kag gilayon nga ginsundan man siya sang duha ka lalaki nga kaupod niya.
May isa pa ka lalaki nga ginhaboy ang kamera sang CCTV.
Pagkatapos sang insidente, nakit-an sang mga street sweeper nga may madamo nga nagkalabuka nga botelya sa tunga sang karsada.
Gindumdom nila nga aksidente lang ang natabo apang pag- review nila sang CCTV footage, nadismaya ang tanan sang makita ang ginbuhat sang pulis kag mga upod sini.
Ginahulat subong sang asosasyon ang opisyal nga tikang sang Iloilo City Police Office kag sang NAPOLCOM angot sa insidente.
