Nagtaliwan na sa edad nga 97-anyos ang four-time spaceflight veteran nga si Jim Lovell.
Suno kay National Aeronautics and Space Administration ukon NASA Administrator Sean Duffy, nagtaliwan si Lovell sa Lake Forest, Illinois, USA.
“We are saddened by the passing of Jim Lovell, commander of Apollo 13 and a four-time spaceflight veteran. Lovell’s life and work inspired millions. His courage under pressure helped forge our path to the Moon and beyond—a journey that continues today,” kabahin sang tribute sang space administration.
Si Lovell amo ang nagserbe nga commander sang Apollo 13 moon mission sang NASA sang 1970.
Ang amo nga misyon ang ginlaragway nga “successful failure” matapos naka-eksperyensya ang spacecraft sang paglupok sang oxygen tank linibo ka milya halin sa Earth.
Minilyon ka mga tawo ang nag-monitor sang safe nga pagbalik nanday Lovell kag duha ka iban pa nga astronauts diri sa duta nga isa sa ginakabig nga pinaka-iconic nga space travel.
Si Lovell nga kabahin man sang Apollo 8 mission amo ang una nga tawo nga duha ka beses gid nga nakakadto sa bulan.
