Maga-upod ang civic group nga Jalaur River for the People Movement sa daku nga protesta nga patigayunon sang nanuhay-tuhay nga mga sektor sa Domingo, Septyembre 21, sa tuyo nga manawagan batok sa lapnagon nga kurapsyon.
Sa interview sang Bombo Radyo sa coordinator sang grupo nga si John Ian Alenciaga, iya gintawag ang Jalaur River Multipurpose Project Phase II sa Calinog, Iloilo nga amo ang “pinadaku nga flood control scam” sa isla sang Panay.
Nagpahayag ini sang pagkaalarma bangud nag-doble suno sa ila ang pondo sa proyekto nga lab-ot na sa P20.09 billion halin sa inisyal nga P11.2 billion sang ini ang gin-proponer.
Ginbulgar man sang grupo ang ila ginpahayag nga ila natukiban nga sang 2024, nagbaton ang proyekto sang P7.088 billion nga unprogrammed funds ukon kabahin sang insertions sang Kongreso.
“Kun may ara man kita sang ginapangita nga daku nga scam sa halambalanon sa flood control, dapat ma-imbestigaran, dapat mabusisian ang ini nga Jalaur Mega Dam Project,” suno kay Alenciaga.
Matandaan nga sang 2024, mismo si President Ferdinand Marcos, Jr. ang nagpanguna sa inagurasyon sang phase 2 sang Jalaur dam project nga amo ang una nga large-scale water reservoir sa guwa sang Luzon.
‘FALSE, INCOMPLETE, AND MALICIOUS STATEMENTS’
Nagpaguwa naman sang statement ang National Irrigation Administration (NIA) nga nagapaandam batok sa mga sala nga impormasyon kaangot sa proyekto.
Wala ini sang gintumod nga grupo nga amo ang ginhalinan sang statement, apang pahayag sini, nagalapta ini online kag sa mga unibersidad sa syudad sang Iloilo.
“The public is hereby cautioned to be deliberate and to exercise due diligence about these false, incomplete and malicious statements of certain groups and individuals,” suno sa NIA. Gindugang sini nga ini nga mga claims sang pila ka mga grupo ang ginahungod gid agud nga mapatalang ang publiko.
“The inaccurate and unsubstantiated claims of these groups were purposely meant to distort facts and mislead public. All these claims and accusations should have been properly addressed had these group/s/individuals exercised due diligence in its inquiry with the office. Its accusations are not only bereft of any factual basis but may have been derived from unreliable source thus, resulting to inaccurate conclusions,” dugang sa Facebook post sang ahensya.
Pahayag sang NIA, ang National Economic Development Authority (NEDA) Board nga ginapangunahan mismo ni President Marcos ang nag-apruba sang Restructuring Request sang amo nga Jalaur project sang Hulyo 19, 2023.
Ginpahayag nga nagalakip ini sang pagsaka sang budget nga lab-ot sa P 8.487 billion apang ini tanan ang nag-agi sa husto nga procedures kag guidelines paagi sa Investment Coordination Committee, kag gin-deliberate kag gin-aprubahan sang nagakaigo nga mga ahensya sang gobyerno.#
(Photo: Bongbong Marcos/FB)
