Naglab-ot na sa halos 20 ang kumpirmado nga numero sang napatay sa Cebu kasunod sang magnitude 6.9 nga linog.
Base sa Provincial Information Office, may 13 ka mga napatay sa Bogo City nga amo ang sentro linog 9:59 kagab-i.
Siyam diri ang adults samtang apat naman ang kabataan.
Sa separado kag nauna nga report sang San Remigio Police Station, ginpahayag nga may lima nga napatay sa amo nga banwa.
Lakip sa mga napatay sa amo nga banwa amo ang isa ka personnel sang BFP kag tatlo halin sa Philippine Coast Guard (PCG) nga yara sa San Remigio Sports Complex and Recreation Center sang natabo ang insidente.
Natabuan nga may ginahampang nga basketball game sang naglinog gani nga madamo nga tumalan-aw ang na-trap samtang ang iban naman naigo sang naulog ang mga debris samtang nagakaran-karan pagguwa.
Magluwas sa sini nga uniformed personnel, patay man ang isa ka bata sa separado nga lokasyon matapos nga narumpagan ini sang pader samtang nagakatulog.
Nag-rekomendar naman ang San Remigio officials nga ipaidalom na ang banwa sa state of calamity.#
(Photo: Rowena Capistrano)
