Ginbulgar ni Cardinal Pablo Virgilio David nga nakapalapit sa iya kag nagpangayo sang “moral and spiritual advice” ang pila sa mga Katoliko nga senador kag kongresista nga involved sa kurapsyon sa flood control projects.
Wala ginhingadlan ni Cardinal David kun sanday sin-o kag pila ka legislators ang nagkadto sa iya, apang ginkumpirma sini nga pareho nga may halin sa Senado kag sa Kamara.
Wala man sini ginhinambit kun san-o nagkadto sa iya ang amo nga mga indibidwal.
Nagapati si Cardinal David nga patimaan ini nga buhi pa ang konsensya sang mga involved kag apektado man sila sa kun ano na ang nagakatabo subong.
“Well, now many of them are waking up. And that’s good. Nasasaktan na sila. That means buhay ‘yung conscience nila. Hindi pa ‘yan patay. Buhay pa ‘yan. Pwede pa ‘yang magbago. Kasi affected sila,” pahayag sang Filipino cardinal nga amo man ang presidente sang Catholic Bishops’ Conference of the Philippines (CBCP).
Matandaan nga sa ginpatigayon nga mga hearing sa Kongreso, na-implicate ang pila ka mga kongresista kag senador paagi sa pagbaton sang kickback. Tanan ini nga mga opisyal ang nagpanginwala nga may kahilabtanan sa kurapsyon.
Sa bahin sang Simbahan, ginklaro sang Cardinal nga wala sang balibaran ilabi na kun nagapangayo sila sang giya sa espiritual kag moral nga aspeto.
“We will not turn down people who, in all honesty, are really seeking our spiritual and moral advice, despite their reputation,” pahayag ni David.
Dugang pa sini, sang nagpalapit sa iya ang mga opisyal, wala sang may nagklaro kun handa sila nga magkadto sa awtoridad kag mag-ako sa ila nga mga sala.
“Nung sabihin ko lang… ‘What are you willing to admit? Hanggang saan?’ Siyempre tahimik sila, and then merong tipo na, ‘I know the legal implications of that,'” suno kay David. “‘Am I ready to face those legal implications?’ Parang gano’n. It’s an offer, at least they know they are aware of it.”
Nagpahanumdom man ini nga indi lang tubtub sa pagpangumpisar ang dapat nga himuon. Dapat suno sa iya nga may paghinulsol kag pagasundan sang “act of reparation” ukon pag-uli sa kun ano man ang kinawatan.#
