Preso ang isa ka lalaki matapos ginluthang-patay ang iya kapid sa Sitio Dawis, Barangay Lagubang, Barotac Nuevo, Iloilo.
Ang suspek amo si Alfonso, 56-anyos, kag residente sang Barangay Tubungan, Barotac Nuevo; samtang ang biktima amo si Zaldy.
Sa interview sang Bombo Radyo kay Police Captain Jersey Besas, Officer-in-Charge sang Barotac Nuevo Municipal Police Station, iya ginpahayag nga nagpadulong si Zaldy sa ila ancestral house sang nabal-an niya nga ara didto si Alfonso.
Nagpuisay ang duha kag nagsakitanay tubtub nga naglakat si Alfonso kag nagkuha sang armas sa sulod sang balay kag gintiro si Zaldy sa ulo kag dughan.
Gilayon naman nga gindala ang biktima sa ospital apang gin-deklarar na ini nga dead-on-arrival.
Ginpahayag sang mga otoridad nga ang away sang mag-utod naghalin sa isyu sang poste sang wifi nga nakatindog sa duta sang ila pamilya.
Napasakaan na sang panumbungon nga homicide ang suspek, kag posible pa madugangan sang kaso nga illegal possession of firearms.
