Ginsuspinde ni Iloilo City Mayor Raisa Treñas ang klase sa syudad sang Iloilo para buwas, Nobyembre 3, bilang pagpanghanda sa mangin epekto sang Bagyo Tino.
Sakop sang suspension ang klase sa tanan nga lebel sa pampubliko kag pribado nga mga eskwelahan.
Sa interview sang Bombo Radyo Joy Fantilaga-Gorzal, spokesperson sang alkalde, iya ginpahayag nga kabahin ini sang pagpangaman sang syudad sa posible makusog nga hangin, pag-ulan, kag pagbaha.
Ginklaro sini nga sa latest advisory sang alkalde, magapadayon naman ang trabaho kag operasyon sa Iloilo City Hall.
Ginapahanumdom sa tanan ilabi na sa mga nagapuyo sa flood-prone, manubo, kag coastal areas nga magkoordinar gid sa barangay officials para sa posible patigayunon nga preemptive evacuation.
Pananglitan kinahanglan ang pagbakwit, may yara sang 450 ka evacuation centers nga yara sa tanan nga distrito.
Naka-preposition man ang food packs sa tanan nga distrito para nga mapanagtag kun may yara sang emerhensya.
Ginpasiguro man nga naka-monitor 24/7 ang Iloilo City Operations Center agud nga maka-responde gilayon kag agud nga makahatag sang advisories sa mga pumuluyo kadungan sang bagyo.
Kaina sang aga sang nagsulod si Tino sa Philippine Area of Responsibility. Alas dos subong nga hapon, nahimo na ini nga Severe Tropical Storm.
