Ginkumpirma ni Ombudsman Jesus Crispin “Boying” Remulla subong nga aga nga nagpaguwa na ang International Criminal Court (ICC) sang arrest warrant batok kay Senator Ronald “Bato” Dela Rosa.
Wala pa sang dugang nga mga detalye nga ginpatpat ang Ombudsman kun san-o eksakto ang petsa sang pagpaguwa sang warrant.
Sa bahin sang Department of the Interior and Local Government (DILG), ginpahayag ni Secretary Jonvic Remulla nga wala pa sang red notice nga napaguwa ang Interpol batok sa senador.
“As per the center for transnational crimes, there has been no red notice issued by the Interpol as of 10 minutes ago,” suno sa tiglikom.
Sa pihak nga bahin, ginsiling sang Department of Justice (DOJ) nga gina-verify pa nila ang impormasyon.
“We have also not yet seen or received a copy of said arrest warrant. We shall provide further details as soon as it becomes available,” suno kay DOJ Spokesperson Polo Martinez says.
Mangin si Atty. Maria Kristina Conti, assistant to counsel sa ICC, ang indi pa man makakumpirma sang impormasyon.
Si Dela Rosa ang hepe sang Philippine National Police (PNP) sang ginpatuman sang Duterte administration ang drug war.
Kun matandaan, sini lang nga Oktubre, nagpahayag si former senator Antonio Trillanes IV nga mahimo ipaguwa sang korte ang warrant of arrest batok kanday Dela Rosa kag Christopher “Bong” Go sa “temprano nga bahin sang masunod nga tuig.”
Sanday Go kag Bato ang pareho nga suod nga mga kaalyado ni former President Rodrigo Duterte nga subong naka-detain naman didto sa ICC detention facility sa The Hague, Netherlands.
Ginpahayag naman ini ni Trillanes kasunod sang iya pagbisita sa The Hague. Ginapahayag man nga regular ang koordinasyon sang anay senador sa ICC sa pag-sumite sang mga ebidensya kag magpangita sang mga testigo kaangot sa kaso nga crimes against humanity batok kay Duterte.
Pila ka beses naman nga nagpahayag si Dela Rosa nga handa siya nga mag-atubang sa ICC.
Sang Hulyo 2025 naman, sa isa ka interview kay Executive Secretary Lucas Bersamin, ginpahayag sini nga makabaton si Dela Rosa sang kaangay nga treatment sa kun paano man ang pag-tratar kay Duterte sang gindakop siya sang Marso 11, 2025#
