Isa ka factory worker sa Khanty-Mansiysk, Russia, ang ginkasuhan sang iya nga kumpanya matapos namalibad nga ibalik ang masobra ₱4.9 milyon (7 milyon rubles ukon $87,000) nga aksidente nga napadala sa iya nga bank account bangud sa software glitch.
Ginkilala ini nga si Vladimir Rychagov, nga nakabaton sang 7.1 milyon nga rubles magluwas pa sa iya nga 46,954 rubles nga vacation pay.
Suno kay Rychagov, may mga istorya sadto sa ilanga pabrika angot sa “13th month bonus,” gani gindumdom niya nga kabahin ini sang amo nga benepisyo.
Apang makaligad ang pila ka adlaw, gintawagan siya sang accounting department kag ginhambalan nga nagsala sang padala ang kumpaniya kag dapat ibalik niya ang kwarta.
Apang namalibad si Rychagov kag nanindugan nga may kinamatarung siya sa amo nga kwarta.
Base sa mga dokumento nga gin-file sa korte, ang kwarta nakatigana para sa suweldo sang 34 ka empleyado.
Sa baylo nga ibalik, gin-gamit niya ang kwarta agud magbakal sang salakyan ka iban pa nga propedad.
Sa subong, padayon ang dalagan sang kaso batok kay Rychagov.
