Masobra 15,000 ka mga pasahero sang tatlo ka nagapanguna nga airline sa Pilipinas ang naapektuhan sang software update sa Airbus A320 family sang eroplano kun sa diin halos 100 ka flight ang ginkanselar ukon na-delay.
Suno kay Acting Transportation Secretary Giovanni Lopez, ginkanselar sang Cebu Pacific kag Philippine Airlines (PAL) ang 78 ka domestic flights halin sa update sang ila A320 kag A321 Airbus fleets.
Dugang pa niya, sa pihak sang mga tikang nga ginahimo, nagalaom sila nga indi na magtaas pa ang numero sang apekatado nga pasahero kag macontrol na ang sitwasyon.
Samtang, gin-report man sang Airasia ang pagka-delay sang pila ka flight, apisar nga gamay lamang ang epekto sang ila nga fleet.
Suno kay Gomer Monreal, director sang flight operations sang AirAsia, isa lamang ka aircraft ang apekatado.
Ang aircraft nga ini ang nakalupad na kag compliant na.
May 11 flights ang na-delay kag 1,545 ka mga pasahero ang naapektuhan.
Ginsiling man sang PAL kag Cebu Pacific nga umpisahan na nila ang rollout sang software updates sa ila mga eroplano.
Ginalauman nga matapos ang upgrade buwas.
Pila sa mga flights sa Iloilo area ang nalakip sa kanselasyon nga amo ang mga masunod:
- Iloilo – Puerto Princesa – Iloilo
- Manila – Iloilo – Manila
- kag Manila – Iloilo – Manila
Suno sa Cebu Pacific, napahibalo na ang apektado nga mga pasahero sang ini nga kanselasyon paagi sa email kag ginhatagan sang mga options paagi sa Manage Booking portal sang Cebu Pacific website.
