Nagalaum ang Pilipinas nga magapakita ini sang mabaskog nga performance sa 2025 Southeast Asian Games sa Thailand bangud ipadala sini ang mga dalagkuan nga delegasyon sang atleta sa kasaysayan sang kompetisyon sa Disyembre.
Ginpunto man ni Philippine Sports Commission chairman Patrick “Pato” Gregorio nga halos nag-doble ang mga delegado subong nga edisyon kag ini magahatag sa Pilipinas sang mas maayo nga tsansa para sa mas daku nga exposure sa international stage.
Nagahatag man ini sang oportunidad sa mga Filipino athletes nga maka-atubang sa mas mabaskog nga kompetisyon sa gwa sang pungsod ilabi na sa mga atleta nga nagapaninguha nga makalab-ot sa Asian Games kag Olympics.
Ginhatagan man sang Philippine Sports Commission sang slots sa national team ang mga nagdaog sa Palarong Pambansa kag Batang Pinoy para sa masobra 50 ka events sa 2025 SEA Games.
Nahibaluan nga natapos sa ikalima nga puwesto sang tuig 2023 edition ang Pilipinas nga ginhiwat sa Cambodia.
