Pormal na nga ginpasakaan sang kaso ang pila ka opisyal sang Department of Public Works and Highways sa Davao Occidental kag pila ka kontratista.
Ini na ang ikaduha nga “major case” nga ginpasaka sang Office of the Ombudsman sa korte subong nga kabahin sang ila pagtinguha nga mapanabat ang mga involved sa flood control scandal.
Suno kay Assistant Ombudsman Mico Clavano, ang ila pagpasaka sang isa naman ka kaso ang kasunod sang pagkuha sang nagakaigo nga ebidensya batok sa mga akusado.
Ini ang may kaangtanan sa nadiskubrehan nga “ghost flood control project” sa Davao Occidental nga gin-award pa sang tuig 2022 kag may balor nga 96.5 milyon ka pesos.
Upod man sa mga respondents ang duha ka pribado nga indibidwal nga sanday Roma Angeline Rimando kag Sarah Discaya, tag-iya sang St. Timothy Construction Corporation.
Ang mga partikular nga kaso nga ginpasaka sang Ombudsman batok sa ila amo ang Malversation of Public Funds through Falsification of Public Documents kag paglapas sa Section 3(e) sang Republic Act 3019 ukon Anti-Graft and Corrupt Practices Act.
