Ginkumpirma sang National Bureau of Investigation (NBI) nga may yara na sang pending nga aplikasyon para sa red notice sa International Criminal Police Organization (Interpol) batok sa anay Ako Bicol Partylist Representative nga si Zaldy Co.
Suno kay NBI Spokesperson Atty. Palmer Mallari, ginpaagi ang request sa Philippine Center for Transnational Crimes sang Nobyembre 23.
Kun aprubahan na, iga-pahibalo sang Interpol ang mga pungsod nga miyembro sini kaangot sa warrant of arrest batok kay Co.
Dugang pa ni Mallari, ginakabig na subong nga undocumented alien si Co matapos gin-kanselar ang iya pasaporte sini nga semana. Ini nagakahulugan nga mahimo siya dakpon bangud sa paglapas sang mga layi sa imigrasyon sang pungsod nga iya subong nga ginapuy-an.
Una na nga ginpahayag sang Department of the Interior and Local Government (DILG) nga nag-issue ang Interpol sang blue notice batok kay Co. Ang Interpol blue notice nagapangayo sang dugang nga impormasyon parte sa identidad, lokasyon, ukon aktibidad sang isa ka tawo nga may labot sa isa ka criminal investigation.
Matandaan nga sentro sang kontrobersiya si Co bangud sang ginaalegar kahilabtanan sa budget insertions nga may koneksiyon sa mga iregularidad sa flood control kag kickbacks,
Sandig sa latest nga impormasyon sang DILG, yara ang anay kongresista sa Portugal.
