Ginabanta nga 40% sang mga tawag nga nagasulod sa 911 Unified 911 system amo ang prank calls.
Suno ini kay Department of the Interior and Local Government (DILG) Undersecretary for Public Safety Jed Patrick Mabilog kadungan sang iya paghatag sang update sa mga pumuluyo sa amo nga emergency hotline.
Pahayag ni Mabilog, magluwas sa prank calls, gamay ukon menor na lang nga mga problema ang nakit-an sa amo nga hotline halin sang ginlunsar ini sang Septyembre 11, 2025.
Sa subong suno sa iya, ginabanta 2-million na ka mga tawag ang nabaton halin sang launching nga katumbas sang average nga 60,000-70,000 calls kada adlaw.
Lakip man sa ginarepaso sang awtoridad ang kadamuon sang tawag, kag ginarekomendar man sang DILG ang pagpasaka sang numero sang call takers.
Kun indi gilayon masabat sang regional 911 centers ang call, gina-transmit ini sa National Command Center agud nga malikawan ang delays sa pag-cater sang emergency calls.
Una na nagpahanumdom ang Philippine National Police (PNP) nga dapat gamiton sang husto kag responsable ang 911.
Nagpaandam man anay ang ahensya ng kun magpadayon ang prank nga mga tawag sa 911, iga-block na ang tag-iya sang number kag indi na maka-access sa emergency assistance.
Nahibaluan nga ginpasangkad ang amo nga hotline sa mga rehiyon sa pungsod agud nga mapabakod pa ang emergency response services kag agud madasig ang pagresponde sang pulis kun kinahanglanon.
