Nagasimpatiya si Undersecretary Jed Patrick Mabilog kay former House Speaker Martin Romualdez apang nagapanindugan man nga dapat atubangon sang kongresista ang layi.
Antes nagpungko si Mabilog bilang Undersecretary sang Department of the Interior and Local Government (DILG) Undersecretary for Public Safety, siya ang nagtrabaho bilang special adviser sa former House Speaker umpisa sang Mayo 2025.
Sa iya appointment sang amo nga tion, nakabutang sa memorandum nga ang iya kontribusyon kag kaalam sa iya field of expertise ang importante para sa pagpaayo pa sang legislative agenda para sa Kamara.
Sa interview sang Bombo Radyo kay Mabilog sa iya pagbisita sa Iloilo City subong nga adlaw, iya ginpahayag nga konektado lang siya sa opisina sang Speaker sang amo nga tion, apang nangin maayo man ang ila nga personal relationship.
Suno pa sa former Mayor, dapat nga magpaidalom si Romualdez sa husto nga proseso-legal.
“I also sympathize with him sa iya ginaagyan subong, but he has to face the full force of the law, and undergo the right legal process,” pahayag sini sang ginpangayuan siya sang reaksyon.
Nahibaluan nga gindagdagan ang former House speaker sang warrant of arrest sa kaso nga plunder nga naangot sa iregularidad sa government flood-control kag infrastructure projects.
Ginmandu naman sang Sandiganbayan Third Division nga dal-on siya bwas sa University of the Philippines- Philippine General Hospital (UP PGH) para sa independent examination sa iya ikaayong-lawas.
May nauna naman nga mandu halin sa Sandiganbayan nga naga-set sang detention sini sa New Quezon City jail sa Payatas apang nagapanindugan ang kampo ni Romualdez nga kinahanglan sini ang hospital confinement bangud sa sampaw-sampaw nga balatian.#
