Ginakabig gihapon sang Department of the Interior and Local Government (DILG) nga isa ka “flight risk” si anay House Speaker Martin Romualdez apisar sang mga ginaalegar sini nga medical condition.
Ang “flight risk” amo ang isa ka akusado nga ginalantaw nga posible magpalagyo agud nga malikawan sini ang trial ukon imbestigasyon.
Suno kay Interior Secretary Jonvic Remulla, tag-iya si Romualdez sang duha ka private jet, tatlo ka helicopter kag tatlo ka mga yate.
Ginpahayag ni Remulla nga himuon sang gobyerno ang tanan nga kinahanglan nga tikang agod mapunggan nga makapalagyo ukon makabiya sa pungsod si Romualdez.
Sa subong, yara ang kongresista sa isa ka pribado nga ospital sa San Juan City matapos nga gin-aresto base sa warrant sang Sandiganbayan kasunod sang kaso nga plunder.
Bilang isa ka person deprived of liberty ukon PDL, gina-restrict ang iya paghulag sa sulod sang ospital.
Suno kay Remulla, 24 oras nga ginabantayan si Romualdez sang duha ka armado nga guwardiya sa gwa sang iya kuwarto, may yara man armado nga mga guwardiya sa lobby, kag may mobile patrol nga nagabantay sa gwa sang ospital.
Ginpaathag pa ni Remulla nga ginatugutan lamang si Romualdez nga magkadto sa mga bahin sang ospital nga kinahanglan niya kadtuan.
Nahibaluan nga lakip sa ginabulong kay Romualdez amo ang heart and blood vessel disease, unstable angina, may previous heart procedure, stroke-related disease, diabetes, hypertension, high cholesterol, kag underactive thyroid.#
