Pila sa highlights sa 3rd impeachment complaint vs Marcos, ginpatpat ni ex-Cong. Defensor

Nalakip ang pag-“kidnap” kay former President Rodrigo Roa Duterte sa mga rason kun ngaa nag-file sang impeachment complaint sanday former Anakalusugan Partylist Rep. Mike Defensor batok kay President Ferdinand “Bongbong” Marcos, Jr.

Ginpahayag ini ni Defensor sa interview sang Bombo Radyo apisar nga nauna na ginsiling sang ila nga grupo nga ipatpat nila ang grounds sang impeachment kag iban pa nga mga detalye sa press briefing buwas, Enero 23.

Marso 11, 2025 sang gindakop si Duterte kag gindala sa detention facility sang International Criminal Court (ICC) sa The Hague, Netherlands bangud sa kaso nga crimes against humanity.

“Hindi talaga nirespeto ang ating Saligang Batas, at maging ang proseso sa Rome Statute,” suno kay Defensor. “Dapat nagkaroon ng local warrant of arrest. Para niyong kinidnap eh, state kidnapping nga yung tawag natin diyan.”

Ginmensyonar man sini ang isyu sa unprogrammed allocations kun sa diin apektado suno sa iya ang Panay-Guimaras-Negros Bridge.

“Apektado kayo diyan [sa Iloilo]. Imbes na lagyan ng pondo, inilipat, nilagay ang pondo sa unprogrammed allocation tapos ginawang flood control,” suno sa iya.

Magluwas diri, na-mensyonar man ni Defensor ang isyu sa presyuhanay sang kalamay. Matandaan nga sa isa sa mga expose ni former Rep. Zaldy Co sadtong 2025, ginbuyagyag sini ang ginaalegar nga iregularidad sa Bureau of Customs kag ang mga ginansya sa sugar kag onion importation.

Dugang pa, lakip man sa highlights sang ila complaint amo ang kontrobersiya sa pondo sang Philippine Deposit Insurance Corporation (PDIC) kag PhilHealth nga ginsaylo sa national treasury.

Ang katapusan nga na-mensyonar ni Defensor nga highlight sang ila complaint amo ang alegasyon sang presidential sister nga si Senator Imee Marcos nga adik si President Marcos.

“More or less, nasa six to seven cases ang diyan sa amin,” suno kay Defensor.

Kaina sang gintuyo nga i-file ini nga impeachment complaint, apang wala ginbaton sang Office of the House Secretary General bangud nga wala diri sa Pilipinas si Secretary General Cheloy. Ginrason sang opisina nga wala sang bisan isa sa ila ang awtorisado nga magbaton sang complaint.

Maga-istoryahanay pa sanday Defensor kag ang iya grupo kun ipasaka nila liwat ang ila nga reklamo.

Antes kanday Defensor, wala man ginbaton ang separado nga complaint batok kay Marcos nga ginpasaka naman sang Bagong Alyansang Makabayan.

Matandaan nga ang isa lang ang madinalag-on nga naka-file sang impeachment complaint batok kay Marcos nga amo si Atty. Andre de Jesus. Ginbaton ni Garafil ang verified kag duly-endorsed complaint sang Lunes, Enero 19, kag ginpasaka na sa Speaker’s office.#