Nakabulsa sang bulawan nga medalya ang duha ka mga Ilonggo sa nagapadayon nga 13th ASEAN PARA Games sa Thailand.
Nangibabaw ang wheelchair fencer nga si Marlyn Garrucho, tumandok sang Oton, sa wheelchair Women’s saber category.
Ginlutos sini ang isa pa ka Pinay nga si Marieta Hernandez sa quarterfinals, 15-6, antes ginpierde ang mga tiglawas sang Thailand nga si Duean Nakprasit sa semifinal match, 15-13, kag si Thitirat Pengprasittipong sa gold medal match, 15-11.
Sa pihak nga bahin, sa athletics, duha naman ka bulawan nga medalya ang naangkon sang 46-anyos nga si Rodrigo Podiotan Jr. nga tumandok sang Brgy. Bantay, Santa Barbara.
Nakuha sini ang amo nga mga medalya sa event nga 400m kag 100m racing wheel chair T52 classification.
Ginlutos sini ang multi-titled Paralympian kag iya long-time sparring partner kag abyan nga si Jerrold Pete Mangliwan.
Nag-set man si Podiotan sang bag-o nga Games record nga 1:01.06.
Sa interview sang Bombo Radyo kay Podiotan, iya ginpahayag nga nagalaum siya nga paagi sini nga kadalag-an, makalab-ot sa mga natungdan ang panawagan nga suportahan ang para-athletes.
Nagpanawagan man ini sa iban nga mga tawo nga bisan may kasablagan sa lawas, dapat maghandum sang mataas kag magpasakop sa mga kumpetisyon kun may talento ukon abilidad nga mahimo mapakigbahin para nga sarang man mapabugal sang Pilipinas.
Proud naman ang Ilonggo coach sini nga si Ernie Candelario sa nalab-ot ni Podiotan.
Pahayag sang coach, sa nagligad nga edisyon sang ASEAN Para Games, fourth placer si Podiotan apang wala ini nag-untat sa paghanas tubtub nga nalab-ot sini ang gold medal kag naka-break pa sang record sa hinampang.
“Hindi rason nga bisan isa siya ka PWD person nga nadapu-an sang sakit nga polio. Umpisa sang bata pa siya kag naga wheel chair nalang siya. Pero wala siya nadulaan sang paglaum nga maka hatag sang bugal Hindi lang sa probinsiya sang ILOILO kundi sa bilog nga pungsod sang Pilipinas . Sa tunga sang kapigaduhon Nag bakas gid si Rodrigo nga mag practice para makasulod sa minimum standard kag mag represinta sang pungsod.,” kabahin sang post sang coach nga tumandok sang Napnapan, Tigbauan.
Nahibaluan nga ang 13th ASEAN Para Games amo ang multi-sport event para sa mga atleta nga may disabilities. Sanctioned ini sang ASEAN Para Sports Federation (APSF). #
