Siling nila, kun handom mo gid nga malab-ot ang isa ka butang, masarangan mo himuon ang tanan.
Isa siguro ka konkreto nga halimbawa diri ang isa ka lalaki sa India nga bangud sa iya pagka-desperado nga matuman ang iya handom nga mangin doktor, nasarangan sini nga magpautod sang tiil.
Ang ginatumod nga lalaki amo si Suraj Bhaskar, 20-anyos, taga- Uttar Pradesh, India.
Base sa impormasyon, duha ka beses nga wala nakapasar si Suraj sa entrance exam sa medical school.
Bangud sini, napaminsaran niya nga hingalitan ang layi nga nagahatag sang slots para sa mga PWDs apang kinahanglan gihapon nga makapasar sa minimum requirements.
Ginpahayag nga naghimo-himo sang istorya ang pamilya ni Suraj nga ginlabo ini apang duda ang mga pulis bangud malimpyo ang hiwa sa iya tiil.
Sa maid-id nga imbestigasyon, kumbinsido ang mga pulis nga hungod nga ginpautod ni Suraj ang iya tiil.
Sa subong, nagapaayo ini sa hospital.
Sa baylo naman nga mahatagan kuntani sang disability certificate para makasulod sa med school, mangatubang ini sang mga kaso kag magaresulta sa pagkaguba sang iya handom nga mangin doktor.
