Indi sa gihapon maagyan ang naguba nga dalan sa bahin sang Sitio El Dulog, Barangay Ned, Lake Sebu, South Cotabato, matapos ang nagluntad nga landslide sang Pebrero 13, dala sang mamunog nga ulan kag padayun nga coal mining operations sa lugar.
Apektado man diri amo ang masobra 100 families nga nagahingyo sang relocation site bangud sa dala nga peligro sang landslide.
Nahibaluan nga nagpatawag na sang special session sa Pebrero 23, 2026 si South Cotabato Vice Governor Arthur Dodo Pingoy, nahanungod sa pagbulig sang Provincial Government sa mga residente nga naapektuhan.
Ipatawag man sang Sangguniang Panlalawigan sang nasambit nga probinsya ang Department of Energy kag iban pa nga ahensya nahanungod sa coal mining operation sa lugar.
Sa subong, nag-ubra sang temporaryo nga alagyan ang mga residente sa lugar.
