Arestado ang 12 ka Korean nationals nga ginaalegar nagatrabaho sa isa ka ginapasuni scamming hub sa Angeles City, Pampanga.
Suno sa Bureau of Immigration (BI), natabo ang raid sang Pebrero 25 nga nag-resulta sa pag-aresto sa 33-anyos nga si Yu Jaemin.
Pahayag sang BI, nag-ugat ang operasyon sa intelligence information nga nabaton nga nagapahayag nga involved ang amo nga indibidwal sa pag-operate sang suspected scam hub kun sa diin ang ginapuntariya amo ang kaangay sini nga Korean nationals kag posible nga iban pa nga foreigners.
Sandig pa sa report sang ahensya, nadiskubrehan naman ang 11 ka iban pa nga foreigners nga nagatrabaho sa opisina sa Poinsettia Street sa Angeles City kun sa diin naka-estasyon sila sa individual work areas kag amo ang aktibo nga nagapangamot sa operational equipment.
“The individuals were found engaged in work-related activities at the time of enforcement, prompting immediate verification of their identities and immigration status,” suno pa sa ahensya.
Natukiban man sang BI nga pugante ang tatlo sa foreign nationals kag may yara sang existing derogatory records. Ang iban naman sa mga arestado ang natukiban man nga naga-overstay na sa pungsod nga isa ka paglapas sa Philippine Immigration Act of 1940 (as amended).
Sa amo nga operasyon, isa pa ka Korean ang nag-abot sa premises kag nag-claim nga lessor siya ukon manager sang propiedad. Ginpahayag nga nagpasilabot ini kag nag-claim nga ginpadala siya sang Korean authorities. Sang gin-verify sa Korean government, nakumpirma nga wala ini sang kaangtanan sa awtoridad.
Ginbyahe ang mga arestado sa Manila para sa booking kag documentation, kag nagapabilin subong sa BI Warden’s facility samtang ginapangatubang ang deportation cases.#
