Ginbawian sang kabuhi ang isa ka Malaysian national samtang masobra 20 naman ang nagapabilin nga missing kasunod sang pag-collapse sang siyam ka panalgan nga building nga gina-construct pa lang sa Barangay Balibago, Angeles City, Pampanga.
Suno sa Bureau of Fire Protection (BFP), isa ka person with disability (PWD) ang Malaysian national kag na-trap sa sulod sang apartelle nga tupad sang nag-collapse nga building.
Sandig sa Angeles City Disaster Risk Reduction and Management Office (ACDRRMO), 26 ka tawo ang na-rescue (as of 2:30 p.m. kahapon, Mayo 24) samtang 23 naman ang nagapabilin nga missing.
Padayon naman ang ginapatigayon nga manual search and rescue operations.
Indi pa klaro kun ngaa nag-collapse ang building, apang suno sa alkalde sang Angeles, lantawon nila ang construction procedures lakip na ang soil testing.
Ginaduso man sini nga hibaluon kun may substandard materials nga gin-gamit sa building.
Nagpadala naman ang Department of Public Works and Highways (DPWH) sang heavy equipment kag engineers agud nga magbulig sa search and clearing works.
