Madamo na ang luyag mangin paryente sang Filipina weightlifter nga si Hidilyn Diaz — indi lang bangud sa maragtason nga gold medal sini nga nadag-an sa Olympics, kundi bangud sa iya premyo nga lifetime supply sang libre nga gatong.

Sang Tokyo Games 2020 pa sang nadag-an ni Diaz ang bulawan nga medalya, apang nadumduman subong ang iya insentibo kag madamo ang nag-share bangud sang pagtimbuok sa presyo sang gatong sa Pilipinas nga epekto sang giyera sa Middle East.

Si Diaz amo ang una nga nakakuha sang gold medal sa Pilipinas matapos ang 97-anyos nga paghulat sang pungsod sa maragtas sang Olympiada.

Nagbubo ang incentives sa iya sang amo nga tion. Magluwas sa cash, may yara sang perks kag mga pribilehiyo nga ginhatag ang madamo nga mga brand. Lakip diri ang isa ka kumpaniya sang langis nga naghatag sang P5-million nga reward kag bilog nga kabuhi nga suplay sang libre nga gatong.

Napa-throwback ang mga Pinoy ilabi na nga subong nga adlaw, Marso 10, ang una nga adlaw sang pagpatuman sang staggered ukon pahat-pahat lang nga big-time oil price hike.

“Si Ms. Hidilyn Diaz na yata ang pinaka-maswerteng tao ngayon, lifetime free fuel ba naman,” pahayag sang isa ka Facebook page.

“Mareng Hidilyn Diaz, naalala mo nung mga bata pa tayo? Ako ‘yung nagbigay sa’yo ng chichirya sa klase natin noon. Kumusta ka na, classmate?” lahog naman sang isa ka Facebook user.

“Hidilyn, my friend!” sabat naman sang isa ka Redditor.

Mangin ang Olympic champion ang naglahog man sang nadumduman sini ang iya incentive.

“PUWEDE KAYANG I-CLAIM ITO — sa panahon ngayon?” pahayag sini sa iya nga Instagram Story sang Lunes, Marso 9.

Nahibaluan nga dungan nga nagpatuman ang major oil firms sang pagsaka-presyo sa gasolina, diesel, kag kerosene bangud sang disruptions sa suplay kasunod sang away sang Israel kag US batok sa Iran nga naglapta na sa Middle East.#

RELATED ARTICLESMORE FROM AUTHOR