Nalutos ang 43-anyos nga Pinoy boxing legend nga si Nonito ‘The Filipino Flash’ Donaire sa kamot sang Japanese rising star nga si Riku Masuda sa WBA bantamweight title eliminator sa Yokohama, Japan.
Apisar puno sang kumpyansa nga nagsaka sa ring ang four-division champion, nagapabatyag na ang edad sini.
Natumba ini sa ika-pito nga round paagi sa straight left sang Japanese boxer. Sa 1:12 mark sang ika-walo nga round, ginpa-untat na ang hampang.
Mas manubo si Donaire sa tatlo ka mga scorecard sang gin-untat ang amo nga sambuwa.
Pananglitan nagdaog si Donaire, mahatagan kuntani siya sang kahigayunan nga makasaka sa boxing ring para sa world title.
Ini na ang pang-apat nga tion nga nalutos si Donaire sa iya lima ka ulihi nga hampang, lakip na ang second round technical knockout batok kay undisputed bantamweight champion Naoya Inoue sa ila rematch sang 2022.
Gina-uyatan ni Donaire ang 43-10 (28 KOs) nga record.
Kilala anay ini bilang pound-for-pound fighter sang 2010s kag ginkilala nga Fighter of the Year sang 2012.
Nakahimo siya sang rekord bilang pinakatigulang nga bantamweight world champion sang Mayo 2021 sa edad nga 38-anyos sang gintumba sini si Nordine Oubaali sa ikaapat nga round agud nga makuha ang WBC title.
Na-retain sini amo ang amo nga titulo paagi sa isa pa ka fourth-round knockout batok sa isa pa ka Pinoy boxer nga si Raymart Gaballo pito ka bulan ang makaligad sa iya hampang kay Oubaali.
