Ginkumpirma sang Department of Energy (DOE) nga magaabot na sa masunod nga semana ang 250,000 tubtub 300,000 barrels sang krudo nga gin-order sang Pilipinas.
Wala ginsapubliko sang ahensya kun diin ini halin, apang ginkumpirma nga halin ini sa isa ka pungsod sa Southeast Asia.
Suno kay Energy Secretary Sharon Garin, kabahin ini sang tikang sang gobyerno agud nga mabuligan ang pribado nga oil firms nga magbakal sang dugang nga suplay sang langis.
Padayon pa suno sa iya ang paninguha nga may kuhaan pa sang suplay paagi sa government-to-government transactions, apang ang maga-gasto amo ang pribado nga oil companies.
Ini nga amount ang makaigo lamang para sa duha ka adlaw, apang suno kay Garin, siguruhon nila nga ma-cover sang kabug-usan nga suplay (pati ang daan nga suplay) pati ang bilog nga Mayo.
Sandig sa nauna nga tatlo ka trading days sa world market, yari ang posible nga isaka sa presyo sang produktong petrolyo sa masunod nga semana:
Diesel-P7.00/liter
Gasoline-P5.00/liter
Kerosene-P10.00/liter
May nabilin pa nga duha ka trading days nga possible magbuhin, ukon posible magdugang sa price adjustments.
Pebrero 28 sang nag-umpisa ang gyera sa Middle East nga amo ang nag-apekto sa presyuhanay sang langis sa madamo nga parte sang kalibutan lakip na sa Southeast Asia.#
